Holterbarg

Et was mal en ontiederig weer vandaege, mar we bin d’r toch mar een dag op uut west. We hebben et Netuurmuseum Holterbarg in Holten bekeken. As jonge van 19 he’k in de zoemer van 1965 mit Jelle, Jan en Thomas kampeerd op Twenhaarsveld in Holten en neffens mi’j bin we d’r doe ok west. Dat is dus 59 jaor leden. Doe hiette et grif nog van Museum Piet Bos. Want dat was de grondlegger van et prachtige museum mit schitterende diorama’s en allegeer opzette dieren, ok een protte voegels. D’r was ok een film te zien van hoe as een stienmatter opzet wodde. De keunst is dan om et leven d’r as et waore weer in te kriegen. Hiel arg mooi allemaole. Nao et museum hewwe in een resteraantien d’r tegenover een bakkien drinken mit een hiempien limoentaart had. We hebben vanaovend heerlik waarm eten had in resteraant Boszicht in Ni’jberkoop. Ie kriegen daor meer veur minder centen as bi’j Van der Valk en de kwaliteit is prima! Hieronder nog een foto die ‘k vandemiddag maekt hebbe. Dit is een klein pat van ien van de grote diorama’s.