Holocaustmuseum

Ik hebbe vandaege de citaoten uut et interview dat Magda Dullemond mit me had het vertaeld in et Stellingwarfs. Zoks kan niet aanders, et is vanzels te gek en laot mi’j Nederlaans praoten. Et interview komt in de glossy Stiek’m trots die dit veurjaor uutkomt. Ik bin ok begonnen mit et rippeteren van de verhaelen die ‘k de kommende deensdagaovend vertellen zal in Eesvene. Et laeste optreden veur de eerste staaropperaosie daor a’k slim tegenop zie.

Netuurlik he’k vandemiddag keken naor de eupening van et Nationaol Holocaustmuseum in Amsterdam deur de keuning. Willem-Alexander hul een mooie toespraoke. Et is waor: Sobibór begon mit een bottien in et Vondelpark mit de tekst Veur Joden verbeuden d’r op. Giftige woorden kun et begin wezen… Et antisemitisme nemt overal weer toe, ok in Nederlaand. Dat is utermaote griezelig. Leren meensken dan nooit van et verleden? Nee dus. Lao’we oonze demekraosie mit vri’jheden, rechten en plichten koesteren. Et is een groot goed. Dimmestreren mag ok in een demekraosie. Geertje en ik hebben vandemiddag drekt ofpraot dawwe vandemeitied tegere naor et museum toe zullen.