Holocaustmuseum

Vandemorgen om goed tien ure bin ‘k op ‘e trein in Wolvege stapt. Geertje zat al in de trein, die was in Liwwadden al instapt. We hadden ofpraot en gao vandaege naor et Nationaol Holocaustmuseum in Amsterdam. Dat museum wodde een schoffien leden eupend deur de keuning. Butendeure stonnen doe meensken te raozen en mit Palestijnse vlaggen te zwaaien. Dat was doe biezunder ongepast. Schaandelik. In Amsterdam hewwe in et resteraant van et Centraol Stesjon eerst wat drinken had mit wat mini-kroketties en bitterballen d’r bi’j en doe biwwe lopende naor et museum gaon dat in de buurt van De Hermitage en et Waeterlooplein is. Et ligt tegenover de uut de oorlog zo bekende Hollandsche Schouwburg. D’r ston bewaeking veur beide gebouwen en we kwammen deur een soortement sluus et museum in. Et antisemitisme gript weer om him henne. Dat is ok meer as schaandelik. We hebben et museum bekeken. D’r was een protte volk en iederiene keek in stilte naor en beleefde zo et gruweliks wat gebeurd is. We wussen vanzels alles wel, mar toch… Et gebral van Hitler en wat me nog et meerste angreep was de lange trein die deur een grote bocht votree vanuut Westerbork. De trein naor de dood. Mit de haand veur de mond he’k et bekeken. D’r kwam een groepien leerlingen in mit onderwiezers d’r bi’j. Et was een kebaol van jewelste. Et is mooi dat ze daor henne gaon, mar die onderwiezers hadden heur zeggen moeten dat ze stille wezen mossen. Dat deden ze niet en doe het iene aanders dat mar daon. En doe was et stille. Et indrokwekkende Holocaustmuseum bekiek ie in stilte. Doodse stilte. We hebben d’r ok nog wat drinken had mit wat d’r bi’j. En doe biwwe mit lijn 14 van de tram weer naor et Centraol Stesjon reden. Daor tegenover hewwe bi’j Loetje lekker eten had. Et was een mooie mar ok een hiele indrokwekkende dag. Hieronder een foto die ‘k vandaege maekt hebbe. Dit is vlakbi’j de Stopera. Et was trouwens hatstikke lekker weer in Amsterdam, ik hadde de jasse wel thuus laoten kund.