Hollands Siberië

Ik hadde de jaoren deur een oold en oftaans stereotorentien mit boxen in de kaemer staon. Et spul warkte al jaoren niet meer. Now luuster ik haost nooit naor de radio en a’k al es een cd beluusteren wol, dee ‘k dat in de auto. Mar in de ni’je auto kan dat niet meer. Ik hebbe lessend een hiele flut cd’s en dvd’s naor de kringloop brocht, mar om now nooit meer een cd dri’jen te kunnen was me ok te gek. Dat op die meniere bin d’r vandemiddag twie manluden van Punter Electronica Service uut Wolvege west en die hebben me een Soundmaster radio/cd-speulder brocht en de boel ansleuten en insteld. Et is een mooi ding en ik snappe ok nog hoe a’k d’r mit an moet. Dat now ja, as de daegen now aansen slim kotten, luuster ik in schiemerdonker naor de prachtige trompetkonserten van Telemann.

Ik hebbe et boek Hollands Siberië van Mariët Meester lezen. Een mooi boek en et speult hier vlakbi’j in Veenhuzen. Et gaot over de franciskaan Peter Pex die in 1936 naor ‘et slechtste dörp van Nederlaand’ stuurd wodt. Veenhuzen. Hi’j komt daor in dienst van de strafgestichten en perbeert d’r van te maeken wat d’r van te maeken is. Tiedens de Twiede Wereldoorlog belaant hi’j mit zien huushoolster in et verzet en hi’j krigt een geheime relaosie mit heur. Et boek vertelt over de opkomst en de ondergang van een man die Veenhuzen zien beste krachten geven wil. Toegeliekertied is et een ontroerend verhael over twie meensken die op laetere leeftied de liefde ontdekken.