Hollaanseveld

Ik moch vandemiddag vertellen veur een klein koppeltien senioren in dörpscentrum ’t Anker in Hollaanseveld. Mit nog gien twintig meensken zat ik in een zael daor wel meer as honderd in kunnen. Zo gaot et… Ik was in 2014 ok een keer bi’j heur west te vertellen. Nao ofloop kree’k een boekien van heur kedo: Hönnig in de heide. Dréentse zegswiezen op een riege. In de tied van Boer Koekoek weren hier neffens mi’j nogal wat boereprotesten. Ik hebbe d’r vandemiddag niks van murken.

Hieronder nog een foto die ‘k gistermiddag maekt hebbe in et Noord-Veluws Museum in Nunspeet. Een fragment van een schilderi’je van Frans Huysmans mit daor de kruusweg van Jiezus op. Hiel toepasselik in disse daegen. D’r ston veerder gien verhael bi’j. Mar aj’ goed kieken dan dreegt Jiezus hier et kruus niet. Die dat wel dot kan gieniene aanders wezen as Simon van Cyrene. Neffens et verhael pakten de Romeinse soldaoten zomar een toeschouwer uut et volk en die mos et kruus veerderdregen doe Jiezus dat te zwaor wodde. En die man was Simon van Cyrene.