Hof van Schoterlaand

Ik was vandaege te gaaste in partycentrum Hof van Schoterlaand van Henk Hosper in Mildam. Dat was een bekend adres veur mi’j, want ik hebbe daor jaoren laank in de grote zael staon mit mien boeken op ‘e Wintermark van Mildam. Ik moch daor vandemorgen om elf ure vertellen veur de Past Rotary Club van Et Vene. Ik hadde een koppeltien van tien meensken veur me zitten. Et was aldergenoeglikst om veur heur te vertellen. Ik hebbe twie keer een half ure verteld. De veurzitter bedaankte me in et Stellingwarfs. As geboren Fries wodde hi’j indertied direkteur van de botterfebriek van Makkinge. En daor het hi’j zo gauw meugelik Stellingwarfs leerd, want hi’j wol de tael van de boeren daor praoten kunnen. Zoks vien ik mooi. In zien toespraokien zee hi’j ok dat alle taelen geliekweerdig binnen. Stellingwarfs is krek zovule weerd as Fries en Limburgs. As d’r toch es meer meensken weren mit zoe’n helder oordiel. Zoe’n man moch van mi’j drekt kultuurdippeteerde wodden. Zien Stellingwarfs was trouwens, nao al die jaoren dat hi’j al uut de Stellingwarven weggaon was te wonen, nog hatstikke goed. Nao mien vertelderi’je moch ik mit heur miteten. Heerlike champignonssoep en alderhaande soorten brood en beleg. Heerlik! En doe bin ‘k daor gauw de Kuunder weer overflut naor de Stellingwarven toe.