Hoenderdaell

Naodawwe vandemorgen henne te stemmen west weren, bin we d’r op uut west. We bin naor et grote en mooie dierepark Hoenderdaell in Anna Paulowna west. Hiel mooi en vule groter as we docht hadden. Et was daor heerlik weer mit volop zunne. De wolven stonnen naor oons te kieken, een logge beer begon hadde te lopen, een lieuw lag laankuut. Een oehoe reup zachies iederkeer zien naeme en de condor uut de Andes spreidde zien vleugels uut. Wat een vlocht het die voegel as hi’j in de locht zweeft! De aepies dwarrelden oons om de bienen henne. Flamingo’s en ibissen leuten zien hoe mooi rose en rood as ze binnen. En… een mannegiessturk wol seks mit een vrouwgien, mar zi’j wol niet. Ik hadde daor alle begrip veur. Zoe’n mannegien zit om disse tied henne vol daodedrang en wil almar seks en zi’j vint dat veur een keer best wel es lekker, mar niet altied. Et bin krek meensken… We hebben ok an een kwis over katachtigen mitdaon. Ik hadde negen van de tien vraogen goed! In et park hewwe wat drinken en een hiempien appelgebak had. We hebben om vier ure eten had in Viscentre ’t Wad in Den Oever. Ik hadde petat en een lekkerbekkien. Hieronder twie foto’s die ‘k maekt hebbe. Boven: ondaanks et zuver wat waarme weer weren disse aepies an ’t ommedonderjaegen en baldiezen. Onder: de lepelaars wodden sloeg van et waarme veurjaorsweer en gavven heur lekker daele onder een boom.