Hoe Van Gogh naar Groningen kwam

Vandemiddag he’k een bestelling van mien laeste boek Naozoemerlaand naor Afke van Drogen in Wolvege brocht. Die woont daor in een mooi appattement op et plak waor vroeger de Dreeshusies stonnen. We hebben genoeglik praot, ik hebbe d’r een peer bakkies thee dronken en ze het me daor van alles zien laoten. Zeune André kwam ok nog even langes en die bleek vlakbi’j Jarmo te wonen. Dat we hadden praot zat mit mekaander!

Ik hebbe et boek Hoe Van Gogh naar Groningen kwam lezen. Lessend he’k de tentoonstelling mit dezelde naeme in Grunningen zien en dit boek heurt bi’j die tentoonstelling. Een prachtig boek daor ok alle schilderi’jen in staon die in Grunningen te zien weren of misschien nog wel binnen. An et aende van de negentiende ieuw orgeniseerde een koppeltien studenten tentoonstellings in Grunningen mit wark van o.a. Vincent van Gogh en Jan Toorop. In die tied duurden zokke tentoonstellings mar een dag of wat. Vandaege-de-dag duren grote tentoonstellings in de bekende museums meerdere maonden. Mar die studenten zetten Grunningen doe wel op ‘e kulturele kaorte. Ien van die studenten was de laetere beroemde historikus Johan Huizinga die bekend wodden zol deur zien boek Herfsttij der Middeleeuwen. Deur die tentoonstellings kwam uuteindelik in 1918 de Grunninger Keunstkring De Ploeg tot staand mit schilders as Johan Dijkstra, Jan Altink en Jan Wiegers die dudelik beïnvloed weren deur Van Gogh.