Hoe Van Gogh naar Groningen kwam

Ondaanks de zeerte an heupe en/of spieren moet ik wel in beweging blieven. Ik bin d’r vandaege dan toch mar op uut west. In de waarme trein naor Grunningen en daor naor et Grunninger Museum dat pal tegenover et treinstesjon ligt. Ik hoefde dus niet veer te lopen. Ik hebbe daor de mooie tentoonstelling Hoe Van Gogh naar Groningen kwam bekeken. An et aende van de negentiende ieuw orgeniseerden een stokmennig studenten een Van Gogh-tentoonstelling in Grunningen en dat wodde een groot sukses. In mar een dag of wat kwammen d’r 1.600 bezukers. Dat liekt veur now niet vule, mar et was doe een protte. Ze orgeniseerden laeter ok een tentoonstelling mit wark van Jan Toorop. Op disse tentoonstelling is een protte wark van Van Gogh en Toorop te zien. Mar ok van Mesdag en zeker ok van de bekende schilders van De Ploeg: Jan Altink en Johan Dijkstra. De schilders van De Ploeg weren zeker ok schatplichtig an Van Gogh. Dat is te zien op onderstaonde drie foto’s die ‘k maekt hebbe. Boven: De spitters uut 1889 van Vincent van Gogh, midden: Zichter in koren uut 1922 van Johan Dijkstra en onder: Rustende zichters ok van Johan Dijkstra uut 1922/23. Prachtige schilderi’jen. Nao de bezichtiging he’k in et museumresteraant wat eten: een peer plakkies bolle mit vegetarische kroketten. Hiel lekker. In de trein weeromme vul ik iederkeer haost in de slaop. Dat hej’ aj’ naachs vusen te min slaop kriegen.