Johan Veenstra
Stellingwarver schriever en verteller

Hobbymark

Plaetst op 12 feberwaori 2022.

Vandaege ston ik mit mien negosie op ‘e hobbymark in d√∂rpshuus De Buorskip in Beetsterzwaog. Op ‘e Wintermark in Mildam kwam an et aende van november nog mar weinig volk. De meensken dusten et doe nog niet an. Vandaege kwam d’r beheurlik wat volk opzetten, wel allemaole mit een mondkappien veur zoas et heurt, mar ie konnen marken dat de meensken d’r naor snakken en gao weer argens henne. Ik hebbe mit een protte meensken praot en prima verkocht! Verschillende meensken begonnen weer over de stiekelstokkies die ‘k eertieds op ‘e radio vertelde. Dat is trouwens altied en overal zo. Veur et gevuul van een boel meensken is dat vermoedelik et belangriekste wa’k as schriever uut de wege zet hebbe. Ik bin en blieve veur een protte volk de man van de radio. Tussen de middag he’k me daor zels mar trakteerd op een koppien tomatesop en een brotien kroket. Heerlik!
Mien goeie vrunden Johan en Gertie uut Almelo bin Stellingwarvers in de vremde. Ze wonen in et prachtige Twente en gaon geregeld naor et netuurgebied Springendal bi’j et mooie stattien Ootmarsum. Ze stuurden me gister onderstaonde foto toe die ze maekt hebben bi’j Hoeve Springendal. Meensken staon niet altied op heur veurdieligst op petret, peerden ok niet!