Historie

Vleden weke stonnen Jan (Peereboom) en Riny (Reiken) hier onverwaachs veur de deure. Ze weren onderweg van een kotte vekaansie in Tecklenburg naor De Jouwer waor ze wonen. Ze kwammen an mit de tiedinge dat Jan een boek over zien leven schreven hadde en ze kwammen mi’j een exemplaor anbrengen. Et boek hiet Historie en Jan het d’r veur inschreven: Voor Johan de oude buurjongen van mijn moeder Margje Eits. Lieve gr. Jan P. Zoks is nog es aorig! Margje heur moeder Klaosien (Klaasje Pander) woonde, doe ik een hiel klein joongien was, naost oons. Wi’j woonden aachteruut et laand in, zi’j woonde allienig veur an de weg. As joongien leup ik vaeke naor heur toe. Klaosien hadde een radio van de draodomroep. Dat was een wonder! Ik heurde bi’j heur et snarpende geluud van de moters op ‘e TT in Assen. De weg veur oons huus was doe nog niet verhadded. Et was een zaandweg mit een nuunderpattien d’r naost. En as ik naor Klaosien gong, leup Flora, ien van oonze beide jachthonnen, mit me mit. Die leup an de slootkaant, zodat ik niet in et waeter valen kon. Bi’j Klaosien waachtte hi’j butendeure op me totdat ik weer naor huus gong. Ik kreeg een keer een stokkien koold vleis van Klaosien, mar dat vun ik zo vies, da’k dat laeter weer uutspi’jd hebbe. En ze maekte een jassien veur de beer die ik hadde. Inderdaod: historie. Klaasje Pander en Jan Eits, de grootoolden van Jan, hadden vier kiender: Margje, Marten, Jan en Trien. Margje, zien moeder, trouwde mit Johan Peereboom, de melkboer van De Blesse. Ik hebbe et boek mit genoegen lezen. A’k over et leven op ‘e Blesse leze, dan was dat vanzels aenlik etzelde as et leven in Ni’jhooltpae en de aandere kleine Stellingwarver dörpen. Winkelties, neringdoenden, boeren en arbeiders. En een vule riekere netuur as vandaege-de-dag. Een tied die al lange niet meer bestaot. Hieronder een mooi petret van Klaosien en heur dochter Margje dat in mien fotoalbum zit.