Hieltied onbekender

Ik hadde vandaege gien tied om van de vekaansie te bekommen. Vandemorgen om tien ure wa’k al in et Huus van de Taol in Beilen. Daor kwam de dichtbundel Hieltied onbekender van Chris Canter uut. Wi’j hebben boeken ruild. Ik hebbe zien ni’je bundel kregen en hi’j van mi’j Et liek in de Lende. Et was een mooie bi’jienkomst. Renate Snoeijing, de direkteur van et Huus van de Taol, interviewde Chris en netuurlik las die uut zien ni’je bundel veur. De Drentse zangeresse Martije zong een riegeltien lieties. In 2019 verscheen Chris zien verhaelebundel Moenen. Dat boek wodde doe enthousiast onthaeld. Met Moenen zet de Nedersaksische literatuur een stap vooruit schreef et Dagblad van et Noorden. En et Drents letterkundig tiedschrift Roet schreef: Een grote aanwinst voor de Nedersaksische literatuur. En now dan een dichtbundel! Et was mooi dat kammeraod Ingmar d’r ok was. Ik zal over twie weken een dag naor him toe in Nijmegen.

Ik vertelle ok nog wat veerder over oonze midweke vekaansie. Op woensdag biwwe mit de fietsen op ‘e veerboot van Ditzum naor Petkum over de Eems gaon. We hebben die dag een tocht van 50 kilemeter fietst. Dwas deur de smoordrokke stad Emden, veur et stadhuus langes in et centrum. Eindelik kwammen we buten de stad op et prachtige plattelaand mit ok een protte bouwlaand mit graon. Wat is dat toch een mooi gezicht! We bin naor et wondermooie dörp Rysum mit een mooie meule en karke fietst. Et was een betien spietig dat et resteraant daore dichte was en we daor dus niet op et terras zitten konnen om een brotien te behaffelen. Dat hewwe op ‘e weerommereize mar in Emden daon in een bakkerswinkel die an een Netto-supermark vaastezat. We hebben haost alle aovens in oons vekaansiehuus kaant-en-klaor maoltieden had. Behalven op deensdagaovend. Doe hewwe in Ditzum in resteraant  Schifferbörse am Hafen eten. Lekkere kibbeling. Hieronder een foto die ‘k van  de mooie karke van Rysum maekt hebbe.