Hieke

Vandemiddag wa’k bi’j de ofscheidsplechtighied van Hieke Oosterhof. Hieke was de dochter van Joop en Gooitske. Joop was een aachterneve van mi’j. Maendagaovend kwammen Hieke heur breur Edwin en zien vrouw Margo mit de vreselike tiedinge bi’j mi’j an de deure dat Hieke in de naacht van zundag op maendag wegraekt was. Ze hadde tegere mit heur moeder zundagaovend nog naor Boer zuukt vrouw keken… Hieke is mar 56 jaor wodden. Vandemiddag was d’r bi’j Nanninga in Wolvege eerst et kondeleren van de femilie en we kregen wat drinken mit wat d’r bi’j. Daornao was de ofscheidsplechtighied. D’r wodden hiele mooie brieven van Hieke heur naosten veurlezen. En doe biwwe mit mekaander naor et karkhof van Ni’jhooltpae gaon, et dörp daor Hieke op 11 meie 1967 geboren wodde. Et was ontiederig haastweer, et regende en wi’jde. De mooie naozoemer is veurbi’j. Hieke heur leven is veurbi’j. Wat moet d’r now toch van heur hontien Bobby wodden? Waor moet die now henne? Wat toch een vreselik trieste dag.