Heuren

Vandemorgen was ik weer bi’j Jerre Heurzorg, tegenover et ziekenhuus in Et Vene. De vrouw aachter de balie vreug as ik even nao achten op ‘e radio west was. Ze heurde een man die krek zo praotte as ik praote. Mar dat was ongetwiefeld Jan Koops, die het de laeste peer jaor een kollum op Omroep Frieslaand. Krek zoas ik dat vroeger op ‘e donderdag tussen de middag hadde. Mar dat was in de veurige ieuw. Et kan vanzels ok iene aanders west hebben… Ik bin vandaege wat fleuriger bi’j Jerre wegkommen as twie weken leden. Ik moet nao haost zeuven jaor een ni’j heurapperaot hebben en veertien daegen leden deden ze dus een heurtest. Ik mos in een kebine mit zoe’n ding over et heufd. De uutkomst was om je dood te schrikken. Et was deur de jaoren henne hiel arg vule slechter wodden. Ik was hiel eernstig slechtheurend. Ze hadden me doe aenlik votdaolik deursturen moeten naor et ziekenhuus. Vandaege is de test weer daon mit et ni’je heurapperaot. En now zonder koptillefoon en niet in die kebine, mar bi’j de man an et buro. De uutkomst was now een stok beter. Et is wel aorig minder wodden, mar lange niet zo dramatisch as veur twie weken leek. Gelokkig… Et apperaot wa’k now drie weken op proef hebbe, voldot me now al goed. Et bin vanzels dure dingen. Dit gaot me zoe’n 3.400 euro kosten. Ik kope krek as de veurige keer een goeie en dus ok een duren iene. Ik kriege d’r gien cent vergoeding veur, mar ik kan et vanzels wel as butengewone lasten opvoeren in de belastingangifte van ankem jaor.