Hete vuren

Ik hebbe vandaege in de trein naor Harlingen west. Doe ‘k in Liwwadden overstapte vreug een vrouw me daor as ik Johan Veenstra was. Now kan ‘k wel zeggen dat et niet zo is, mar et is vanzels wel zo. Zi’j zol mit heur dochter en een vrundinne van heur dochter een weke naor Terschelling. Ik hope dat ze prachtig fietsweer hebben, dan hebben wi’j et hier vermoedelik ok. In Harlingen he’k in et Hannemahuus de tentoonstelling Hete vuren bekeken. Schatten uit het Rijks... Dit is de laeste van vier thematenstoonstellings: Eerde, waeter, locht en vuur. Tal van schilderi’jen uut et Rieksmuseum Amsterdam reizen de laeste jaoren bi’j zes kleine museums langes en die wo’n dan anvuld mit schilderi’jen uut de eigen kollektie. Ik hebbe alle viere de tentoonstellings now zien. Hete vuren bestaot uut 33 schilderi’jen uut et Rieksmuseum en 6 uut et Hannemahuus zels. Een prachtige tentoonstelling! D’r hangt o.a. wark van Gerard Dou, Jan Steen, Jacob Maris, Jozef Israëls, Gabriël Metsu en nog een hieleboel aanderen. D’r bin ok hiele mooie genreschilderi’jen bi’j. Ik hebbe alles mit et grootste genoegen bekeken. Nao ofloop he’k wat eten en drinken had in brasserie Eats & Sweets.Veurda’k weer in de trein stapt bin, he’k de zee nog even overkeken. Zo mooi… Ik zag meensken an boord gaon veur de overtocht naor Vlielaand. Ik bin al vaeke op Vlielaand west, hebbe d’r zels twie keer henne west om verhaelen te vertellen, mar ik zol hiel arg graeg nog es een keer naor dat mooie eilaand gaon. Hieronder et schilderi’je Meisje met olielamp van Gerard Dou. Et is ien van de schilderi’jen dat now in Harlingen te zien is.