Het uur van de wolf

In dit dagboek meugen vanzels gien fouten zitten. Een korrektie op et stokkien van gister. Harry en Frans bin op vekaansie in Chassanges, dat ligt in de Fraanse Ardeche, 1.200 kilemeter zudelik van Noordwoolde. Dat is een hiele tippe!

Op mien auto zitten een peer hiele kleine krassies/ongemakkies. Aj ’t niet weten ziej ’t niet. Ik wete niet hoe as dat kommen is en vien et ok niet zo slim. Mar Jarmo vint dat zoks niet kan op nog zoe’n mooie, ni’je auto. We bin vandemorgen dus tegere naor Hielkema in Wolvege west. Et is niet duur om et even verhelpen te laoten. Dat de auto zal vandaege over een weke even naor Wolvege en ik kan him dezelde dag weer ophaelen.

Een schoffien leden he’k de thriller Grote zus van de Noorse bestsellerauteur Gunnar Staalesen lezen. Dat is goed bevalen, dat daoromme he’k drekt nog mar een boek van him lezen: Het uur van de wolf. Staalesen schrift arg mooi mit mooie metaforen. Ik wol dat ik dat zo kon. Privédetektive Varg Veum komt in zien stamkefé de pensioneerde pelisierechercheur Nymark tegen. Die is nog altied doende mit een peer oolde zaeken die nooit ophelderd binnen. De ontploffing in een varvefebriek en een moord. Et liekt op et eerste oge niks mit mekaander te maeken te hebben. Mar Nymark daenkt dat d’r toch een verbaand is. Kot naodat hi’j dat an Veum verteld het, wodt de ex-pelisieman schept deur een auto… En dan gaot Varg Veum op onderzuuk uut.