Het hoge noorden

Et is 1 oktober en dus heb ik mien elf ammarillen in et pikkedonker zet. Daor blieven ze een vorrels jaor staon en dan hael ik ze op ni’jjaorsdag weer veur ’t locht. Dan kriegen ze ni’je grond en waeter en dan… kommen de knoppen en gaon ze weer bluuien. Ik bin vandaege ok begonnen mit et rippeteren van de verhaelen die ‘k vertellen zal in Dwingel, Niawier en Appelsche.

Ik hebbe de thriller Het hoge noorden van Ulf Kwensler lezen. Wat een spannend boek! Et is een verhael over vier vrunden die de wildernis intrekken. D’r zal mar iene weerommekommen en overleven… Anna, Henrik en Milena maeken ieder jaor een kuiervekaansie. Anna en Henrik bin een stel en Milena nemt veur de eerste keer heur ni’je vrund Jacob mit. En zo trekken ze mit mekeer de bargen in et noorden van Zweden in. De mobielties doen et niet meer en de tocht is veur betoefde klimmers. En dan bedaenkt Anna inienend dat ze Jacob argens van kent. Is Jacob wel wie hi’j zegt dat hi’j is? De ontspannen kuiertocht veraandert in een stried op leven en dood. Wie overleeft disse gruwelike tocht?