Johan Veenstra
Stellingwarver schriever en verteller

Het gezicht van de duivel

Plaetst op 22 september 2023.

Anke het hier vandemorgen de boel in huus opredded en de beide tuunmannen, Arnoud en Chris, vandemiddag de boel om huus henne. Alles ligt d’r now weer netties bi’j. Wat bin ‘k bliede da’k hier overal volk veur hebbe, ik zol et zels allemaole niet meer doen kunnen.

Een peer weken leden he’k de Deense thriller Schreeuw onder water van Obro & Tornbjerg lezen over pelisieman Jens H√łgh en pelisiepsychologe Katrine Wraa. In dat eerste diel van een serie vunnen die mekeer drekt al slimme aorig. Butendat lossen ze ok nog moorden op. Ik hebbe et twiede deel uut de serie Het gezicht van de duivel now ok lezen. Al weer een mooi een spannend boek. Et verkoolde lichem van een vrouw wodt vunnen in een uutbraande auto in Kopenhagen. De vrouw bliekt levendig verbraand te wezen. Jens en Katrine lossen disse moord vanzels ok op. En ze vienen mekeer almar aoriger, in dit boek hebben ze al uutbundig seks. Dat is vanzels arg mooi. Ik bin dus hiel arg beni’jd hoe as dit veerdergaot. D’r bin nog drie boeken mit moorden en belevenissen van Jens en Katrine. Mar d’r is ien groot perbleem. Die drie boeken bin (nog) niet vertaeld vanuut et Deens in et Nederlaans. Dat now ja, misschien kom ik wel nooit te weten hoe dit veerdergaot.