Het droompad

Omdat de geleerden et de kommende daegen over onweer en regen hebben, he’k vandaege nog mar even lekker op ‘e fiets naor Wolvege west om twie fietstassen vol bosschoppen op te haelen.

Ik hebbe aenlik in iene goeze Het Droompad van Twan Huys uutlezen. Een prachtig boek. De schriever is op et ogenblik in alderhaande tillevisie- en radiopergrammes te heuren over zien boek en hi’j reist deur et laand om d’r over te vertellen. Dat et kan haost gieniene ontgaon dat et boek d’r is. Et moet vanzels wel verkocht wodden. Dat lokt trouwens hiel goed. Tegere mit zien zeune Jack maekt Twan een kuiertocht deur de Alpen en Dolemieten. Bi’jtieden ok een hiele geveerlike tocht. Mar et is vule meer as allienig mar een reisverhael van een vader en een zeune. De oolden van Twan Huys raekten uut de tied en daor gaot et boek ok over. De oolden daor hi’j altied Limburgs mit praotte. En veerder vertel ik d’r hier niks over, want ik gao d’r een kollum over schrieven. Ik kan et boek iederiene anraoden!