Johan Veenstra
Stellingwarver schriever en verteller
Plaetst op 3 november 2022.
Ik zal zo even et pad uut. Eerst za’k naor de Stellingwarver Schrieversronte in Berkoop om een deusien mit exemplaoren van Et liek in de Lende op te haelen veur de verkope tiedens mien optredens. Dan rie ik veerder naor Noordwoolde en daor pik ik Harry op. Tegere zuwwe naor et Centrum veur Prentkeunst op ‘e Fochtel om daor de tentoonstelling Herman Gordijn grafiek te bekieken. Herman Gordijn is indertied vanzels bekend wodden deur et petret dat hi’j van Beatrix maekt het, mar zien overige wark is ok meer as de muuite weerd. Ik zal vanaovend eten bi’j Harry en Frans in Noordwoolde. D’r is me stamppot zoerkool beloofd en ik hope dat die belofte waormaekt wodt.
Ik hebbe hier in huus zeuven lidkaktussen en daor zitten op et ogenblik bi’j alle zeuven dikke de knoppen in. Dat belooft dus allemaole hiel mooi te wodden.