Heerlike fietstocht

Et was vandaege heerlik fietsweer, dat daoromme hewwe een mooie fietstocht van 45 kilemeter maekt. We bin mit de fietsen aachterop ‘e auto naor Appelsche reden en daor biwwe begonnen te fietsen. Deur de bossen naor Vledder en doe over et fietspad bi’j de deurgaonde weg langes via Wapse naor Diever. Daor hewwe op et terras van resteraant Keernpunt luncht. Tegenover et resteraant hewwe in de karke een tentoonstelling bekeken van de Schilderskring van Diever. We kregen elk een kaortien en daor koj’ opschrieven welke drie schilderi’jen aj’ et mooiste vunnen. D’r weren prachtige schilderi’jen bi’j! Echt hiel arg mooi. Op nommer iene kwam bi’j mi’j een bosgezicht, nommer twieje wodde een liende mit wasgoed dat weerspiegelde in et waeter van een sloot. En as dadde he’k een schilderi’je mit zunnebloemen keuzen. Bi’j de waarme bakker he’k lekkers kocht da’k overmorgen mitneme naor Zeelaand. Vervolgens biwwe deur de bossen weeromme naor Appelsche fietst. Wat een mooie dag! Hieronder een foto van et oolde gemientehuus van Diever dat naost de karke staot.