Heerlike fietsdag

Ik kreeg vier mooie reakties op mien kollum die eregister in de Liwwadder Kraante ston. Die mailers vunnen et een ontroerend stokkien. Misschien vunnen wel meer as vier lezers dat. Dat hoop ik mar.

Ik hebbe vandaege een heerlike fietstocht van 50 kilemeter maekt. De temperetuur leup staorigan op naor 25 graoden. Heerlik weer, mar d’r ston nog altied een hadde wiend, mar daor hej’ een elektrische fiets veur. Ik bin vandemorgen eerst op ‘e fiets naor fysiosport west. Daornao he’k een bakkien drinken had bi’j Jarmo en ik hebbe een besteld boek uut de biebeltheek haeld. En doe bin ‘k naor de Driewegsluus fietst. Ik was eerst van doel om wat te eten op et terras van Family in Ooldemark, mar daor zo’k pal op ‘e wiend zeten hebben. Gister hewwe tiedens de boottocht eten in resteraant Ie Sicht. Niet op et terras zoas aanders vanwege de hadde wiend. Mar et terras van de Driewegsluus lag vandemiddag heerlik uut de wiend. Daor he’k dus in de zunne een twaelfuurtien had mit superlekkere aspergesoep. Ik trof Jan en Alie daor, die tref ik wel vaeker op terrassen. We hebben gezellig an ien taofeltien zeten en genoeglik bi’jpraot. Jan was vroeger huusdokter in de Westhoeke. Daornao bin ‘k over de Scheenesluus en deur de Braandemeer weer op huus an gaon. Hieronder drie foto’s van mien mooie laand die ‘k maekt hebbe op et Lendepattien en de Veendiek.