Heerlik fietsen

Vandemorgen betied en in de naomiddag he’k verhaelen rippeteerd veur et optreden van ankem weke woensdagmiddag in Haulerwiek. Daor tussendeur he’k een lekkere fietstocht van 44 kilemeter maekt. Ik bin bi’j de Lende langes naor de Driewegsluus fietst. Wat was et prachtig fietsweer op disse laeste dag van september! In de meitied zatten in de boswallen witte plakken van de bluuiende meidoorns, now zitten daor rooie plakken van alle beien van diezelde meidoorns. Hiel mooi! Op et terras van et paviljoen bi’j de Driewegsluus he’k wat eten en drinken had. En doe bin ‘k bi’j de Lende en Et Wiede van de Lende langes weerommefietst naor de Sas. Van daor bin ‘k over de Nieksweg fietst. De weg tussen de Lende en et dörp Blesdieke. Ik zal daor maendagmiddag weer hennegaon, misschien wel op ‘e fiets, want dan is daor de jaorlikse herdaenking in et vroegere joodse warkkaamp It Petgat. Over De Blesse, Peperge, Steggerde en De Hoeve bin ‘k vervolgens weer naor huus gaon. Hieronder een foto die ‘k vandemiddag maekt hebbe in et netuurlaand bi’j de sluus van Ni’jhooltpae an de Lende. Zi’j vienen dit ooldewievezoemertien ok hatstikke lekker. Wat zo mooi is: disse koenen meugen de kalfies bi’j heur holen. Zo heurt et in wezen vanzels ok. Mar ja, de meensken… Die hebben ok disse mooie dieren veurzien van zoe’n malle gele flappe in de oren. Daor zal wel een nommer op staon. Now ja, zonder dat ze d’r meerst arg in hebben, bin meensken ok al lange nommers wodden. Mar zoe’n gele flappe hewwe nog niet in et oor.