Johan Veenstra
Stellingwarver schriever en verteller

Haulerwiek

Plaetst op 16 november 2022.

Vandemiddag moch ik uut eigen wark vertellen in dörpshuus De Enter in Haulerwiek veur de OSO. Dat bin dus de senioren. Veur de statistieken: dit was optreden nommer 3209. Ik hope toch werachtig da’k de 3250 volmaeken kan en mag. We zullen et zien. A’k de Oolde Gniezerd mar wat op ofstaand holen kan. Et was trouwens een hiele genoeglike middag in et Friese pat van de Stellingwarven. Ze vertelden me dat ze de veurige keer zangeresse Griet Wiersma had hadden en doe weren d’r wel 70 meensken op ofkommen. Now kan ‘k vanels niet tegen Griet opboksen, mar d’r weren vandemiddag toch zoe’n 55 meensken. Dan ma’k toch tevreden wezen! En dat bin ‘k dus ok. D’r kommen dit jaor now nog twie optredens, zo et now liekt. Ik gao hier altied nog mit groot genoegen de deure veur uut. Doe ‘k van Haulerwiek naor huus toe ree, gong de zunne as een prachtige vuurballe onder.