Harry op vesite

Vandemorgen he’k overleg had mit Sanne Bakker uut Zwolle. Zi’j is sund dit jaor de vaaste harpist van et Metropole Orkest. Dat is dus niet niks. Douwe en ik gaon mit heur optreden op 17 juli tiedens Eupen Stal in Berkoop. Zi’j speult op ‘e harpe, Douwe vertelt in et Fries en ikke in et Stellingwarfs. Dat kan een mooie aovend wodden!

Vandemiddag he’k Harry van De Lemmer op vesite had. Ik komme ien keer in et jaor, in december, bi’j him. En hi’j komt zoemers een keer disse kaant op. Hi’j komt trouwens van oorsprong van de Westhoeke. We hebben aldergenoeglikst bi’jpraot. De mond het oons omtrent gien tel stillestaon. We hebben lekker eten had in et resteraant bi’j de Koepelbos in Berkoop. Heerlike gruuntesoep mit flinke ballen d’r in. Niet van dat flutterige spul. Ik hebbe ok lekkere zalm had. Et zat d’r beheurlik vol mit eters. Henk en Lieneke uut Tuk zatten d’r ok. We hebben nog even praot. Zi’j lezen dit dagboekstokkien iedere aovend. Dat now kun ze zels lezen waor ze vanaovend eten hebben! Harry en ik hebben ofpraot dawwe tegere nog een dag naor Beekbargen zullen. Daor het een zeune van him een zoemerhuus.

Vandeweke kwam d’r een kaorte van een aandere Harry en Frans. Zi’j hadden in Museum Belvedere schilderi’jen van Jan Roos bekeken. Joekels van dingen, niet geschikt veur bi’j heur in huus. Hieronder et schilderi’je Nacht – Vissers van Jan Roos. Akrielvarve op pepier.