Harry en et Boegbeeld van Sneek

Ik hebbe vandemiddag op vesite west bi’j Harry op ‘e Lemmer. Vroeger luusterde hi’j as vrachtwaegensjefeur onderwegens naor me as ik donderdagsmiddags mien stiekelstokkies vertelde veur Omroep Frieslaand. Niet wetende dawwe laeter in de kunde kommen zollen omdat zien vrouw Dicky gek op mien boeken was. We hebben vandemiddag aldergenoeglikst bi’jpraot en vanaovend tegere broodeten in zien mooie appattement mit uutzicht op et waeter. Lekkere bolle mit een bakt eigien en rookte zalm. Wat wil een meenske nog meer. Op ‘e hennereize bin ‘k binnendeur over de kleine weggies gaon: Ooldelaemer, Echten, Oosterzee… Op ‘e weerommereize he’k de grote weg over De Jouwer neumen. Et regende flink. Dat was niet lekker rieden in duuster. Ik verneme hiel goed dat et niet lange meer duurt en dan wi’k aovens as et donker is niet meer in de auto vot.

Vandemorgen las ik de mooie tiedinge dat mien kollega-dagboekeschriever en literaire kammeraod Henk van der Veer gisteraovend een Keuninklike Onderscheiding kregen het. Dat gebeurde in de Sunt Mattinuskarke an et aende van Heel Sneek e.o zingt Kerstliederen. Hi’j kreeg de welverdiende onderscheiding van burgemeester Jannewietske de Vries. Zi’j was in et verleden kultuurdippeteerde en ik hebbe al es een peer keer mit heur suteld. Doe dee de Friese kultuurdippeteerde gewoon mit an de Stellingwarver sutelaktie. Dat weren nog es tieden! Kom daor now es omme… Henk en ik schrieven al vule meer as twintig jaor een dagboek op oons webstee. Hi’j in et Sneekers, ikke in et Stellingwarfs. Henk is stadsdichter, schriever, journalist, taelkeunstener… Henk is gewoon et Boegbeeld van Sneek en dreegt op een veurtreffelike meniere ut Sneek gefoël uut. Van hatte, Henk! Mooi man!