Harm en Roelof

Vandemorgen bin ‘k mit Jelle en Gerda naor Gasselte west veur een optreden van et bekende Drentse kabberetduo Harm en Roelof in ’t Maotie. Fettje hadde ok mit zuld, mar die kon deur omstaandigheden niet. We hebben mit ’n drienend votdaolik ofpraot dawwe ankem jaor weer naor Gasselte gaon en dan mit Fettje d’r bi’j. Ankem jaor bin Harm en Roelof trouwens 40 jaor as duo aktief veur et mooie Drents. Kiena was d’r ok mit heur man. Zi’j is vri’jwilliger bi’j de Stellingwarver Schrieversronte en komt van oorsprong van Gasselte. Et pergramme was weer prachtig. Die beide manluden bin deur de jaoren henne hielemaole op mekeer inspeuld. Pattie stokkies en lieties ha’k nooit eerder heurd, mar d’r kwammen ok bekenden veurbi’j. Zoas et mooie lied over de aldermooiste meid van Slien, et vermaekelike verhael en lied over de thuuszorg die bi’j ongelok de buurman van Geert Bos an ’t wasken is en dan komt Geert zien vrouw Margien thuus… En et mooie verhael van de siktaoris van de iesverieninge. In et laeste lietien drokten Harm en Roelof de Drenten op et hatte om Drents praoten te blieven. En… de Grunningers moe’n vanzels Grunnings praoten blieven en de Stellingwarvers Stellingwarfs. Laot oonze mooie taelen niet versloeren, daor bin ze te weerdevol veur. Dan gooi ie een stok kultuur vot dat nooit weerommekomt. Dan gooi ie een stokkien van jezels vot…We hebben vandaege geneuten. Nao et pergramme hewwe d’r ok lekker eten had. Wat een mooie dag! Hieronder nog twie foto’s die ‘k daor maekt hebbe. Boven: ’t Maotie zit in een prachtige oolde boerderi’je. Onder: tegenover ’t Maotie staot et beeld van Wemeltje Kruit (1887-1963). In et Drents was dat vanzels Wemeltie(n) Kruut. As koopvrouw kwam ze op ‘e fiets mit heur negosie in Gasselte en de vere omstreken. Et was ommeraek vrotten om deur de tied te kommen en een peer luzige centen te verdienen.