Harm en Roelof

Om 9 ure wa’k vandemorgen al bi’j Fettje in Noordwoolde en die he’k doe mitneumen in de auto naor ’t Maotie in Gasselte. In et dörp wodde vlagd en bi’j de rotonde wapperden de vlaggen van Nederlaand, Kannede, Frankriek en Polen. Et was vandaege 80 jaor leden dat Gasselte bevri’jd wodde. Dat gelt trouwens ok veur oons hiere. Op 12 en 13 april was de oorlog hier ok veurbi’j. We weren in Gasselte veur et optreden van et in oonze streken wereldberoemde Drentse kabberetduo Harm en Roelof. We kommen al jaoren naor Gasselte om van heur te genieten. Et zat zoas altied stampvol volk. Harm en Roelof hullen dudelik rekenschop mit de bevri’jding en de toestaand in de wereld. Ze zongen d’r prachtige en ontroerende lieties over. Over et kleine schoelemaegien in Drenthe dat een gele steern op heur jassien hebben mos en nog nooit van Auschwitz heurd hadde. Over de beide Syrische jongen die zatten te visken bi’j et Oranjekenaal en et lietien over Kamp Westerbork. Mar netuurlik was d’r ok een protte te lachen. Over de Nedersaksenlijn bi’jveurbeeld. En dan heur grote suksesnommers over de mooiste meid van Slien en et vrouwgien van de thuuszorg dat heur verzinde in et adres en Jans de mond al ofreddede mit een washaantien en him krek de boks uuttrok, doe zien vrouw Margien d’r inkwam. De thuushulp hadde bi’j buurman Geert Bos wezen moeten. Een hilarisch nommer! Ze besleuten heur pergramme mit een lietien over o.a. al die griezels van vandaege-de-dag: Trump, Poetin en die dikke poedzak in Noord-Korea. Et refrein eindigde iederkeer: Mooi dawwe in Drenthe wonen. Nao 80 jaor vri’jhied zitten we now misschien in een tiedvak tussen vrede en oorlog in. Wat zal et wodden? As et misgaot zullen Drenthe en de Stellingwarven letterlik en feguurlik niet buten schot blieven. Nao et pergramme hewwe d’r eten: een brotien Gasselte en een koppien drinken. Wat een mooie dag, mit wapperende vlaggen veur oonze vri’jhied! Ik hebbe daor nog een foto maekt van de Gasselter Catharina-karke uut de dattiende ieuw.