Halve Lazarus

Vandemiddag kreeg ik op Eupen Stal twie keer een aai over de rechteraarm van dezelde mi’j onbekende vrouw. Ze was zo bliede dat ze me weer zag. Ik was ommes zo ziek west. Ik snapte et eerst niet zo goed. Mar doe scheut me in de zin dat ik de laeste twie jaor tiedens een pat van Eupen Stal in et ziekenhuus legen hebbe. Mar ik bin d’r weer en zi’j zag me weer. Veur die vrouw wa’k lichtkaans een betien een halve Lazarus aachter de taofel mit boeken.

Ondaanks alle drokte in Berkoop, daor een groot diel van de dag mit henne gaot, he’k aanders ok nog zat te doen. Ik bin gister de hiele aovend en vandemorgen ok nog mit een toespraoke an de gang west. In de loop van augustus is de feestelike prissentaosie van een boek van uutgeveri’je Bornmeer in et Tripgemael in Gersloot. Ik bin vraogd om daor een toespraoke te holen. Ien van mien fameuze toespraoken, zo wodde dat nuumd. Ik zal et doen en d’r morgenvroeg ok weer mit an de gang. Vanaovend wi’k vri’j hebben en naor een mooie Finse thriller kieken op Canvas. Een mi’j bekende vrouw vertelde me dat ze nao begint te daenken over de dood. En as et zoveer is, wil ze graeg een gedicht van acht riemende regels boven et overliedensbericht. As ik wat veur heur schrieven wil… Ik zal et doen. En zo is d’r altied volop wark.