Haast

Wat een rotweer vandaege. Langdurig regen en et wodde hier hooguut 15 graoden. Zo kan et halfwollen hemd wel an en de Duutse laekens op bedde. Mar… morgen wodt et beter. Daor moe’n we dan van profiteren. Veurdat de regen vandemorgen begon wa’k al henne-en-weer naor Wolvege west. Ik hebbe de lienfiets weerommebrocht en mien eigen fiets weer ophaeld. Daor is een ni’j aachterviel inkommen, omdat de fiets almar deurtrapte. Wat een argernissen. Hopelik is dat gedoe now over. Over een weke moe’n de spaeken nog opspand wodden.

Ik bin altied wend om hier de ansichtkaorten zien te laoten die meensken me sturen. Daor kwam even niks van. Naodat hier een kpn-monteur west was, dee de printer et niet meer. Jarmo het hier west en dat weer in odder maekt. Mar doe dee blieken dat de scan et nog niet dee. En ik moet de ansichtkaorten vanzels eerst scannen veurda’k ze hier zien laoten kan. Jarmo het dat vanof ofstaand ok weer klaormaekt. Et is een wonderlik gedoe aj’ op je komputerscharm zien dat in Wolvege iene mit je komputer an de gang is. Hopelik is mien baankrekening veilig… Hieronder drie mooie ansichtkaorten die me de laeste tied toestuurd wodden . Boven: Harry stuurde me een kaorte vanuut Frederiksoord. De Klonies van Weldaodighied bin Unesco Wereldarfgoed. Zoks trekt een protte volk. Midden: Henk en Philo stuurden me een vekaansiegroet vanuut Denekaamp in et mooie Twente. Onder: Jelle en Gerda zatten die kaant ok op. Zi’j zatten in een husien op Landal-vekaansiepark De Vlegge in Sibculo. Daor bin ik jaoren leden, van 9 t/m 12 juli 2007, ok mit Jelle west.