Haast

Ik hebbe vandaege een kollum mit de titel Nobelpries schreven, uuttikt en d’r nog es goed an ommeschaefd. Trump tettert de hiele wereld over dat hi’j de Nobelpries veur de Vrede eins heurt te kriegen. Mar hoe staot et aenlik mit de Nobelpries veur Literetuur? Zol d’r ooit an mi’j docht wodden?

Et is vandaege lange niet zok mooi weer as gister. Doe was et prachtig fietsweer. Ik hebbe een tochien van 25 kilemeter maekt. D’r weren trouwens een protte fietsers onderweg op die mooie haastdag. Ik bin bi’j de Lende langes naor Wolvege gaon, vervolgens naor Der Izzerd en doe over et fietspad bi’j de Scheene langes weeromme naor huus toe. Ik hebbe an dat fietspad foto’s maekt van een peer poddestoelen tussen et al van de bomen valen blad. Et is haast in de Stellingwarven. D’r bin van ’t jaor trouwens een protte poddestoelen.