Grou

Vandemiddag wa’k in et mooie dörp Grou. Mi’j wel hiel bekend omdawwe d’r bi’j de zoemerdag geregeld langesveren mit de boot en ok wel es op et terras van hotel Oostergo zitten. De laeste keer, veur de corona, zat Frits Wester van de tillevisie daor ok. Die hadde zien zeilboot daor ofmeerd. Ik moch vandemiddag in datzelde hotel Oostergo vertellen veur de leden van de Grouster Senioren Bûn. D’r weren zoe’n 35 meensken. Grou is vanzels vanoolds ok een literair dörp. Et is et dörp van de breurs Halbertsma: Eeltsje, Joast en Tsjalling. Van heur is et bekende boek Rimen en teltsjes dat vanzels wel bi’j mi’j in de boekekaaste staot. Omda’k wat verkolen bin wa’k benauwd dat mien stemme et begeven zol, mar dat is allemaole goed gaon. Nao ofloop he’k nog een kleine aanderhalf ure mit et bestuur wat dronken en d’r kwammen blokkies keze  op ‘e taofel. Mar doe was et al zowat donker doe ‘k daor de deure uutgong en mos ik deur duuster en hadde regen weer op huus an. Dat laeste begin ik de hieltied meer hekel an te kriegen. Wat toch altied een aekelik weer! Hieronder een foto die ‘k vandemiddag maekt hebbe van et staandbeeld van Eeltsje Halbertsma tussen de haastkleuren.