Grote zus

Vandaege he’k de vriezer ontdujd en schonemaekt en tal van keukenkassies he’k ok schonemaekt. Ik viene me op zokke mementen slimme flink. Vandemiddag he’k op ‘e fiets naor Berkoop west: naor de bakker, slaachter en kezeboerderi’je. In de Ni’je Ooststellingwarver ston vandaege een artikel over tarwemael dat maeld wodde deur meule De Weijert in Makkinge en daor wodde dan brood van bakt deur de bakkers van Verloop op ‘e Gediek. Ik vien dat mooi en hebbe drekt zoe’n bolle kocht. Hiel lekker. Mar aj’ in de bi’jstaand zitten kuj’ vanzels beter een bolle bi’j de Aldi kopen.

Ik hebbe de spannende thriller Grote zus van de Noorse schriever Gunnar Staalesen lezen. Et gaot over Varg Veum, een privé-detektive in de Noorse stad Bergen. Hi’j krigt vesite van een vrouw die him vertelt dat ze zien halfzuster is. Ze zocht heur petekiend Emma, die naor Bergen gaon is om daor te studeren. Na heur verhuzing uut et studentehuus is ze spoorloos verdwenen zonder een adres aachter te laoten. Et onderzuuk brengt Veum naor et roege kustgebied van Bergen en Haugesund daor een kriminele moterbende de baos is… Ik wil meer van disse schriever lezen!