Goold, zulver en een sni’jshoot

Ik hebbe krek de fantastisch mooie Olympische rees op ‘e 1.000 meter hadrieden veur vrouwluden zien. Naodat Femke Kok reden hadde, ha’k verwaacht dat die goold winnen zol. En doe kwam Jutta Leerdam in de laeste rit en die gong krek nog wat hadder. Onveurstelber! Of aenlik ok niet. Aj’ van je geliefde een emmer vol rozen kriegen dan geft zoks je vanzels vleugels, dan kuj’ de hiele wereld an en jaeg ie alles en iederiene d’r of. Dat zol oons ok zo gaon wezen. Mar mooi was et!

Nog wat winters ni’js over de verfilming van mien verhael Sultan deur Steven de Jong. Dat is een verhael dat in de winter speult. As zoks filmd wodden zal moet et winter wezen of ie moe’n et winters maeken. Begin jannewaori was et liekewel echt winters. D’r is doe dus al een dag filmd en et was een blinders mooie dri’jdag/sni’jshoot. Evert-Jan van Bear Cinema verzorgde die dag de kameravoering. Intied is de casting veur bepaolde rollen nog an de gang.