Gloriedagen

Vandemorgen he’k even naor de mark in Wolvege west en daor he’k een kilo proemen kocht. Thuus he’k daor vier heerlike potten sjem van maekt. Ik zal ankem weke nog wat kopen. De lekkerste sjem is eigenmaekte sjem!

Ik hebbe de roman Gloriedagen van Corine Bomann lezen. Et eerste diel van de Waldfriede-serie. Et lest as een trein, ie wo’n drekt mitzeugen in et verhael. Dat de 571 bladzieden ha’k in drie daegen uut. Et verhael begint in Berlien in 1919. De Eerste Wereldoorlog is krek veurbi’j, de keizer is vlocht naor Nederlaand, et is rommelig en onrustig in Berlien. Dokter Louis Conradi kocht een verrinneweerd sannetorie, daor hi’j een ziekenhuus van maeken wil. Hi’j krigt hulpe van de jonge verpleegster Hanna Richter. Die heur verloofde het de mankementen die hi’j in de oorlog oplopen het niet overleefd. Louis, Hanna en de rest van et passeniel van Waldfriede willen een veilig plak wezen veur de bewoners van heur stad. Dokter Conradi, die trouwd is, en Hanna vienen mekeer meer as aorig. En dan komt Hanna in de kunde mit dokter Alexander Kirchfeld… De serie is baseerd op waore gebeurtenissen en op et dagboek van verpleegster Hanna, die dattig jaor in et ziekenhuus warkt het.