Gien toeval

De laeste drie jaor bin ik tiedens Eupen Stal en mien boekeverkoperi’je daor in et ziekenhuus belaand. Dat is vanzels gien toeval meer, dat ha’k zels ok hiel goed in de gaten. Ik vien et prachtig om te doen, mar et levert ok warkdrok en stress op. Ik hebbe in et ziekenhuus an internist en chirurg verteld wa’k allegeer nog doe. Ze schuddekopten. Ik neme dus vusen te vule huj op ‘e vorke en dat zal aanders moeten, want mien gezondhied is belangrieker as et Stellingwarfs en de Schrieversronte. Ok a’k flink wat wark inkotte, raek ik vanzels toch nog wel es in et ziekenhuus mit een daarmofsluting, mar hopelik minder vaeke a’k wark ofstoten en inkotten gao. Ik wete al wa’k niet meer of minder doen gaon zal, mar dat za’k eerst in Berkoop bepraoten. Wat Eupen Stal anbelangt hoop ik dat de Schrieversronte daor ok ankem jaor mit een boeketaofel staon zal. Mar dan zal ik daor bi’jveurbeeld allienig nog op zundag persent wezen. In et Stellingwarver tiedschrift De Ovend van april staot een interview van Kjest Herder mit Gerke Jager, ien van de ni’je bestuursleden van de Stellingwarver Schrieversronte. Hi’j zegt in dat interview dat toonangevende meensken uut de tied raeken zullen, mar dat een ni’je generaosie klaorstaot, die op heur beurt de tael en kultuur overdregen zal. Die toonangevende meensken hoeven drekt nog niet uut de tied te raeken, ze zullen minder of gien wark meer doen kunnen. Die klaorstaonde ni’je generaosie moet now dus al an de bak. Die kan now al dingen van mi’j overnemen omdat ik daor mit stoppe.