Johan Veenstra
Stellingwarver schriever en verteller

Gezinsverpakking

Plaetst op 19 meert 2024.

Ik hebbe et boekewekekedo Gezinsverpakking, wa’k van Harry en Frans kreeg, in iene goeze uutlezen. Wat vien ik dat toch een mooi boekien! De verhaelen in et boekien bin schreven deur Bart en Yolanda Chabot en heur vier zeunen: Sebastiaan, Maurits, Splinter en Storm. En niet te vergeten Hond Bril. Die is nuumd naor heur huusvrund, de vusen te vroeg wegraekte schriever/kollumnist Martin Bril. Hond Bril (2010-2023)  komt zels ok an et woord. Dat stokkien is veur him schreven deur Splinter. Hi’j vertelt dat hi’j oolder begin te wodden, de ogen him mistig wodden, et lopen niet zo goed meer gaot. Hi’j is haost an et aende van zien leven en zal dan ofscheid nemen moeten van de zes baosies daor hi’j zovule omme geft. Ik kreeg de traonen in de ogen bi’j et lezen van dat verhael. Splinter schrift in zien verhael Estafette over de dood van Bril. Dat de dokter kommen mos om him een spuitien te geven en hoe ze daor allemaole mit ommegaon. En weer kree’k de traonen in de ogen. Et is zo ontroerend mooi beschreven. De jongen schrieven ok hiel mooi over heur oolden, want die wo’n ok oolder en d’r kommen tal van mankementen. Yolanda daenkt dat zi’j nao Bril de volgende is die et niet langer opredden zal en ofscheid nemen moeten zal van heur lieve naosten. In de verhaelen kommen we in de kunde mit een biezundere femilie die op heurzels leeft en woont en zo weinig meugelik meensken over de heerd hebben wil. Wat toch een mooi boekien!