Gersloot

Ik moch vandemiddag verhaelen vertellen veur de Vrouwluden van Now, de vroegere plattelaansvrouwluden in Gersloot. Dat was in de Doarpskeamer an de Tienjeweg. Ze hebben nog 19 leden en d’r weren d’r vandemiddag 15 van. Een mooi antal. Ze zatten onder et vertellen in een halve cirkel om me henne. An et begin kwam d’r een vrouw in die drok naor me zwaaide. Die kende me dus, mar ik zag vanzels niet wie et was. Dat was schaandelik, want ze kwam van Ni’jhooltpae. Ze woonde now al 65 jaor in Tsjalberd en was daor beheerder van et dörpshuus west. En doe wus ik et wel weer. Ik hebbe daor in et verleden twie keer verteld veur de bejaorden en hebbe doe mit heur praot. Et was Annigje Fraterman. We hadden vroeger een hoge lappe bouw naost heur huus, tussen de oolde Boverweg en de Lende. Wat aorig om heur nog es weer te zien. Heur breur Piet en zuster Antje wonen nog in Wolvege. Die zo’k ok niet meer kennen. Op ‘e weerommereize naor huus he’k bi’j de Omah op ‘e Gediek nog een flut zunnebloemepitten veur de voegelties kocht. Hieronder nog een foto van vandemorgen. Ik hebbe al weer een lidkaktus in de bluui. D’r zitten nog een protte knoppen in, ik hope dat die allemaole loskommen.