Gerda

Vleden weke kwam de rouwkaorte van Gerardina Engelina (Gerda) Leemans-’t Hooft. Ze is 88 jaor wodden. Vandaege was de ofscheidsbi’jienkomst in Amersfoort. Ik bin d’r niet henne west, vun de lange reize een betien bezwaorlik. Gerda was de vrouw van Sipke Leemans en Sipke was een zeune van Jan Leemans en Neeltje Siegersma. Mien moeder gong vroeger bi’j Neeltien uutvanhuus in Den Haag. Neeltien was een zuster van een zwaoger van mien moeder. Volgen jim et nog? As jonge van een jaor of achttien bin ik in Den Haag wel es op vesite west bi’j Sipke en Gerda. Dat weren doe meensken van om de dattig henne. De laeste keer da’k ze zien hebbe was een goeie twintig jaor leden in Hooglaand, op 7 feberwaori 2004, doe ik optreden moch veur de Fryske Krite van Amersfoort. Ik gong daor mit de trein henne mit een kameraploeg van Omroep Frieslaand veur de tillevisiedokementaire Naozoemerlaand. Ik hebbe de femilie een kaorte stuurd en zal Sipke over een schoffien bellen.

Et wodt een aekelike weke, want ik moet drie keer naor et ziekenhuus veur onderzuken en een gesprek. Ik veurzie vervelende dingen. Mar vandaege he’k nog even op ‘e fiets naor Wolvege west om wat bosschoppen te doen. Et was nog heerlik fietsweer. Vandemorgen het een man hier drie stoelen oplapt, de boel opvuld en zo. Zoks kost een cent of wat, mar ik kan now tot mien dood lekkerder zitten. Dat is ok wat weerd.