Generatie F

Ik bin vandaege mit de trein naor et Drents Museum in Assen west. De laeste keer da’k daor was he’k die mooie goolden helm en aarmbanen nog bekeken. Dat moois is laeter steulen en nog nooit weer terechte. Ik hebbe now de tentoonstelling Generatie F – 75 jaar figuratieve kunst bekeken. Hiel arg mooi! Jaorenlaank wodde figuratieve keunst oolderwets vunnen. Wat een onzin! Dat is now gelokkig niet meer zo. D’r hangt netuurlik ok wark van Henk Helmantel en Siemen Dijkstra. Ik hebbe drie schilderi’jen op petret zet. Zie onder dit stokkien. Boven: Matthijs Röling: De schilder en zijn model. Midden: Douwe Elias: Prinsentuinschool. Onder: Pieter Pander: De ark van Noach. In et museum kwam ik kunde uut de Westhoek tegen! Nao et museum he’k wat eten en drinken had in de serre van City Hotel De Jonge. De eerste keer da’k in Assen wat eten hebbe is krap zestig jaor leden. Kammeraod Haarm en ik deden doe de tienertoer mit de trein en kwammen zodoende ok in Assen. We zollen wat eten in een klein resteraantien. Doe we wat bestelden zee de vrouw hiel gemoedelik in mooi Drents dat ze dan eerst nog even naor de bakker mos om een brood. Wat een aandere wereld was dat. In City Hotel De Jonge hadden ze bolle zat en de hittepetitten die bedienden praotten gien woord Drents. Is dit veuruutgaank? Ik hebbe ok nog even een koolde stadskuier maekt. In de trein weeromme zat ik tegenover een jonge die drok mit zien mobieltien doende was. Doe we bi’j Hoogevene kwammen pakte hi’j een spuitbussien uut de tasse, dee et jak in de hoogte en spuitte wat onder de oksels. Doe pakte hi’j een aander spuitbussien en daor bespuitte hi’j him de kin en de beide polsen mit. Et reuk heerlik. In Hoogevene gong hi’j de trein uut en ikke mar daenken: waor zol die jonge now toch hennegaon? Naor zien vrundinne Melissa die daor een naegelstudio het of… naor zien vrund Jorn die filesefie studeert? Ik zal et nooit weten. Doe ‘k thuuskwam steuf poes krek mit een moes in de bek et huus in en hi’j steuf d’r mitien ok weer uut. Ik was weer thuus!