Gemientelike herdaenking stormramp

Vandemorgen he’k naor kapster Bertha in Et Vene west en ik hebbe d’r ok eten had. Zodoende kon ik vandemiddag netties naor de gemientelike herdaenking van de Waetersnoodramp van 1825. Dat was een mooie plechtighied. Om drie ure vandemiddag kwam een grote groep meensken bi’j mekaander op et begreefplak van Ni’jhooltwoolde. Et dörp dat in 1825 zwaor troffen wodde. Daor verdronken doe vuuf meensken. Burgemeester André van de Nadort hul een toespraoke. D’r wodde een monement onthuld deur de burgemeester en de kultuurdippeteerde. De burgemeester legde bloemen en ludede de klokke van de klokkestoel. Et monement het de vorm van een grafstien. Alle naemen van de in et dörp verdronken meensken staon d’r op. Et monement is aanderhalve meter hoge, krek zo hoge ston et waeter daor twiehonderd jaor leden. Vervolgens biwwe mit mekeer naor et gemientehuus in Wolvege gaon. Daor is een tentoonstelling inricht over de ramp. D’r hangt ok een schilderi’je dat Ton Verheij indertied van de waetersnoodramp maekt het. Wethoolder Roelof Theun Hoen het daor een peer woorden zegd en doe mi’j de gelegenhied geven om et gedicht Schoelplak veur te lezen. Dat gedicht heb ik op verzuuk van de gemiente West-Stellingwarf schreven. De gemiente het ok een mooie foolder uutgeven over de ramp en mien gedicht staot op ‘e aachterkaant ofdrokt. Hiel mooi!