Gemientehuus

Ik was vandemiddag tussen twaelf en ien ure op et gemientehuus in Wolvege. Daor hewwe weer overlegd over de foto die van mi’j as ereburger in et gemientehuus komt te hangen. De burgemeester was d’r bi’j, Hans Breukel, de kultuurambtener en fotograaf Rob de Wind. Wat Rob oons zien leut was mooi, mar d’r zal nog een kleinighied an de foto veraanderd wodden en de boel zal vanzels vergroot wodden. Et moet wat grootte anbelangt passen bi’j de schilderi’jen die indertied van de aandere ereburgers maekt binnen. D’r is ok besleuten dat alle ereburgers op een aander plak in et gemientehuus kommen te hangen. Dat liekt me hiel goed toe! Et ligt in de bedoeling dat et petret halverwege december onthuld wodden zal.
Gister kree’k de aekelike tiedinge dat Jimmy Visser uut Wolvege op 74-jaorige leeftied uut de tied raekt is. Ik hebbe de laeste jaoren niet mit heur praot, mar we stuurden mekeer hiel trouw ni’jjaorskaorten toe. Dat hoeft now niet meer… Jimmy kon mooie verhaelen in et Stellingwarfs schrieven en ze kon ze ok mooi veurlezen.