Gekutkam

Ik kreeg verschillende reakties op mien kollum Krits die deensdag in de kraante ston. In die kollum bruukte ik et woord gekutkam. Dat is gien mal woord, mar neffens et Stellingwarfs Woordeboek riek taelgebruuk uut Ni’jberkoop. Et betekent geziever om niks. Ien van de reakties kwam van Jabik en Baukje. Die mailden me dat een vere veuroolder, Alle Harmens, him in 1811 Kutkamp numen leut, doe iederiene van Napoleon een aachternaeme hebben mos. De ambtener was dat bliekber wat te bot, dat die maekte d’r Katkamp van. Mar Alle Harmens schreef zels trouwens echt van Kutkamp. Zie zien haandtekening hieronder. De naeme het trouwens niet lange bestaon. Alle Harmens zien zeune gong as soldaot mit de Fraanse keizer naor Ruslaand en is in 1812 niet weerommekommen. En zien dochter nuumde heur van Van der Meulen, zi’j hadde een meule in Dokkum. Een kollum levert bi’jtieden mooie verhaelen op!