Geheim Dagboek

Ik bin verslaafd an de serie Geheim Dagboek van de Zeeuwse schriever, dichter, vertaeler en kritikus Hans Warren. Ik leze alle 23 boeken, dagboeken van 1942-2001, now veur de dadde keer. Douwe het ze ok van me te lezen. Ik leze now eerst wat Douwe nog van me hebben moet en dan doe ‘k de beginboeken nog een keer. Ik hebbe now zes boeken lezen, de dagboeken van 1977 tot 1990. Ik beginne as Warren post krigt van een fan, de 17-jaorige Mario Molegraaf uut Waalwiek. Warren is op dat mement 57 jaor. Et zal niet lange duren en dan trekt Mario bi’j him in en bin ze een stellegien. Ze verschillen 40 jaor in leeftied. Alle mals en moois wodt deur Warren optekend. De mooie mementen, de ruzies. Heur reizen naor Griekenlaand. Mario zien grote hulpe bi’j et wark van Warren. Hi’j helpt om Plato te vertaelen, de jaorlikse poëziekelenders te maeken. Warren schrift over zien minderweerdighiedskompleks. Telt hi’j aenlik wel mit in de Nederlaanse literetuur? Waoromme krigt hi’j nooit es een belangrieke pries? En ze smieten mit geld. Al die eteri’jen in de duurste resteraants. Et kan niet op. Hi’j schrift over zien mislokte huwelik mit Mabel, de drie kiender daor hi’j in wezen niks omme geft. En dan spatteren seks en wellust weer van de bladzieden of. Heur kontakten mit aandere schrievers: Gerrit Komrij, Mensje van Keulen, Marga Minco en een hieleboel aanderen… Hi’j vertelt wat hi’j van heur vint en dat is niet zo positief bi’jtieden. En hoe vaeke as ze dronkend wodden en hoe uutgever Bert Bakker in een bordeel op een vremd vrommes daeleploft. En dan ok de prachtige beschrievings van de netuur in Zeelaand en al die museums en karken daor ze in binnen- en butenlaand naor toe gaon. Ik blieve lezen, ok veur de dadde keer, hoe gaot dit veerder? Et is now 25 jaor leden dat Warren uut de tied raekte en we weten now zo staorigan meer. Een hiele protte wat in de serie Geheim Dagboek staot, ston hielemaole niet in zien oorspronkelike dagboek. D’r is van alles bi’j schreven. Hans Warren het in wezen een roman van 23 boeken schreven.