Geen tijd verliezen

Ik hebbe de laeste tied Geen tijd verliezen van Jolande Withuis lezen. Withuis is een bekend biografe. Heur biografie over Juliana uut 2016 was een groot sukses. Vleden jaor kwam Geen tijd verliezen uut. Een biografie over Jeanne Bieruma Oosting. Ien van de bekendste keunsteneressen uut de twintigste ieuw. Ze schilderde en was grafikus. Ze ontsnapte an heur aodellike femilie, gong heur eigen weg. Woonde en warkte in Amsterdam en Peries. Heur femilie vun dat niet zo aorig. Een vrouw uut heur milieu heurde te trouwen en kiender te kriegen. Heur vader steunde heur hielemaole niet, heur moeder laeter wel. Heur moeder was een baronesse van Harinxma thoe Slooten. Ze kwam vaeke bi’j heur grootoolden op Lauswolt in Beetsterzwaog. Jeanne wodde konfronteerd mit een vraogstok dat now nog van belang is: hoe kombineer ie as vrouw je vak mit een liefdes- en gezinsleven? Heur oplossing was radikaol: gien partner, gien kiender. Ze hadde trouwens relaosies mit manluden en vrouwluden. Ze korrespondeerde mit keunstenersvrunden as Ida Gerhardt, Charlotte van Pallandt en Adriaan Roland Holst. En toch… bleef ze toch altied ok een wat deftige mevrouw. Ze raekte nooit echt los van heur ofkomst. Doe heur vader wegraekte, arfde ze een hieleboel geld. Ze was riek en kocht een prachtig laandhuus in Almen. Daor gong ze wonen. Op et ogenblik bin d’r in vuuf museums tentoonstellings over heur wark. Ok in et Centrum veur prentkeunst op ‘e Fochtel. Gao mar henne te kieken!