Gedichten

Vandemorgen he’k naor fysiosport west in Wolvege en vandemiddag he’k een kollum schreven over meulepoes Billie in Winterswiek.

Vleden jaor wodde ik via de Afûk deur rekreaosieschop Marrekrite vraogd en schrief een gedicht veur een TOP-zuil bi’j de Driewegsluus. Ik hebbe dat daon en Naozoemerlaand schreven. Dat wodde goedkeurd en now is et gedicht inderdaod bi’j de Driewegsluus te lezen. Et was bliekber goed bevalen, want een schoffien leden wodde ik nog een keer deur Marrekrite via de Afûk vraogd om een gedicht veur heur te schrieven. Dat gedicht is bestemd veur een TOP-zuil in Noordwoolde. Vlakbi’j et Vlechtmuseum. Ik hebbe et gedicht Een betere tied schreven en ik kreeg vandeweke et bericht dat ok dat gedicht goedkeurd is. In et veurjaor van 2026 zal et in et centrum van Noordwoolde te lezen wezen. Dat duurt dus nog wel een hiel schoft.

D’r kwam vandeweke een kaorte van Jan Berend en Elly vanof heur vekaansieadres in Zeelaand. Ie hoeven veur et mooie weer niet meer naor Spanje toe!