Gedicht op radio

Vandemorgen he’k even naor de Schrieversronte in Berkoop west om boeken op te haelen veur de verkope. Ik hebbe d’r een bakkien drinken en een hiempien koeke had. Nao et eten he’k vandemiddag weer een kleine kuier maekt. Ik neme an dat zoks gezond is. Butendat he’k in klad een kollum schreven, die ‘k laeter wel uutwarken zal. Ik bin ok begonnen an et schrieven van een wat langer verhael, daor gao ‘k laeter ok wel es veerder mit. Burgemeester André van de Nadort van West-Stellingwarf wodde rond kwat veur vufe interviewd deur Omroep Frieslaand-radio in et pergramme Underweis van Eric Ennema en Jan Durk de Haan. Ik hebbe tillefonisch et gedicht Schoelplak veurlezen da’k op verzuuk van de gemiente schreven hebbe naor anleiding van de overstromingsramp van 1825.

D’r is een ni’j boek uutkommen van kammeraod Douwe Kootstra. Tegere mit tekener Tjibbe Hooghiemstra maekte hi’j et boek Stabij. Dat kwam in 2021 uut en verscheen zowel in et Fries as in et Nederlaans. Now is van beide mannen et boek Fisk uutkommen. Et is krek as Stabij uutgeven deur Bornmeer. Douwe zorgt weer veur de verhaelen en Hooghiemstra veur de tekenings. Een prachtig boekien om zels te hebben en kedo te geven. Beide boeken hebben etzelde fermaot.