Johan Veenstra
Stellingwarver schriever en verteller

Gedicht en Verhaele-aovend

Plaetst op 29 jannewaori 2025.

Ik hebbe hier al es wat schreven over de opdracht om een gedicht te schrieven. Et hoeft now niet meer geheim te blieven. De gemiente West-Stellingwarf het me een schoffien leden vraogd om een gedicht te schrieven naor anleiding van de Waetersnoodramp van 1825. Dat leek me wel mooi toe om te perberen, mar ik hadde iene veurweerde. Allienig mar schrieven over de ramp van 1825 wo’k liever niet. Ik wol de tied van doe graeg deurtrekken naor de tied van vandaege-de-dag. Dat was gien perbleem. Dat doe he’k et gedicht Schoelplak schreven. Want ja, de ieuwen deur hebben meensken een schoelplak zuken moeten. Veur een storm en et wassende en verwoestende waeter, veur honger en oorlog, omdat ze vervolgd wodden, omdat ze krek even aanders weren. Et is zodoende ok een hiel persoonlik gedicht wodden. Opdrachtgever en dichter bin in ieder geval hiel tevreden over et rissseltaot. Ik zal et vandaege over een weke veurlezen tiedens de gemientelike herdaenking van de ramp.

Nog even een herinnering. Overmorgen, op vri’jdagaovend 31 jannewaori is d’r een Stellingwarver Verhaele-aovend in Museum ’t Kiekhuus in Wolvege. Et adres is Grindweg 35. Tal van schrievers, vertellers en veurlezers doen mit: Christine Mulder, Jaap Sikkema, Wiesje Mulder, Grietje Bosma, Henk Breukelaar en Johan Veenstra. Et is aovens van 8 tot 10 ure. Wees welkom in ’t Kiekhuus!