Johan Veenstra
Stellingwarver schriever en verteller

Gebakkies

Plaetst op 3 jannewaori 2022.

Gisteraovend he’k op ‘e tillevisie¬† naor Andr√© van Duin en Janny van der Heijden keken. Omdat et morgen 25 jaor leden is dat de laeste Elfstedetocht verreden wodde, veren zi’j in vier ofleverings bi’j alle Friese steden langes. In de eerste oflevering zag ik een protte bekends. De veertocht over de Zwette van Liwwadden over Scharnegoutum naor Sneek. Die route ken ik, want daor veren wi’j ok wel es langes. Ieder jaor zeker ien keer. Veural de beelden van bovenof vun ik mooi. Ik herkende alle broggies en huzen bi’j et waeter langes.
Vandemorgen he’k gauw een flut bosschoppen in huus haeld. Want ja, ik bin in de loop van de weke jaorig en dan moej’ wel wat in huus hebben. De vesite wodt over vier daegen uutsmeerd, want we meugen d’r van et gezag mar twieje op een dag over de heerd hebben. Now hoolt vermoedelik gien meens him daor an, mar ikke dus wel. Et is trouwens hielemaole niet zo gek, want op disse meniere krieg ik ok iederkeer weer een gebakkien. Viere mit mekeer dus! Lekker! En ik daenke nao disse weke echt niet da’k dan op ‘e weegschaole moet om te kieken hoevule a’k ankommen bin. Ik gao zelden of nooit op ‘e weegschaole. Zolange a’k mar onder de honderd kilo blieve is ’t mi’j wel goed. En neffens mi’j lokt dat nog wel. De broeksbaand begint nog niet echt vule strakker te zitten. Morgen is de eerste gebaksdag!
Ik hebbe vandaege de kastboom weer naor boven brocht. Aanderen hebben vermoedelik tieden wark om zoe’n ding of te tugen. Ik bin altied in een peer menuten klaor. Ik pakke dat ding beet, gao d’r mit de trappe op en zette him in de aachterste slaopkaemer die nooit bruukt wodt. Daor staot hi’j et hiele jaor, optuugd en wel. En op ‘e dag nao Sunderklaos hael ik him in twie menuten weer naor onderen toe! Et is gekkewark en pak langer mit zoks omme!