Garriet Jan en Annegien

Et was een roezige dag. Vandemorgen he’k op ‘e fiets naor Wolvege west om een besteld boek uut de biebeltheek op te haelen en bestelde inkpetronen bi’j Jarmo. Bi’j him he’k een koppien drinken had. Vandemiddag kwam d’r best wat regen en onweer. Haarm en Jacob kwammen even langes, die zollen naor et karkhof. Ze hebben hier wat dronken en we hebben gezellig bi’jpraot. Zoks moet aenlik vaeker, mar ja… Daornao he’k nog wat lekkers bi’j de kezeboerderi’je in Berkoop weghaeld veur Anke omdat die tiedens mien vekaansie op poes past het. Ze het et hier drekt weghaeld en ik kreeg heerlike rooiebeiegebak van heur die ze zels maekt hadde. Heerlik!

Ik kreeg lessend et boekien Nieuwe avonturen van Garriet Jan en Annegien. Ik hadde al in mien boekekaaste: Garriet Jan als vrijgezel, dat het mien ome hiel vroeger al es op zien jaordag kregen, en Garriet Jan op volle toeren. D’r bin tien boekies over Garriet Jan en Annegien. Ze bin schreven deur Havanha. Dat was Hendrik van Heerde. Die wodde in 1905 geboren in Vollenhove. Hi’j warkte bi’j et Kamper Nieuwsblad en in die kraante schreef hi’j de verhaelties die laeter in boekies uutgeven wodden. Die boekies weren ontzaggelik populair. Ze wodden uutgeven deur Boom in Meppel. Van Heerde schreef in et Overiessels, mar hi’j husselde in wezen de streektaelen die praot wodden in et greensgebied van Drenthe, Overiessel en Gelderlaand deur mekaander henne. Hi’j bruukte zodoende woorden uut Kaampen, Vollenhove en Meppel. Zo ontston d’r een tael die iederiene makkelik lezen kon. De boekies bin tientallen jaoren oold, mar ik hebbe dit boekien nog mit groot genoegen lezen. Ie marken al lezende dat de tied wel hiel arg veraanderd is. As Garriet Jan en Annegien argens een koppien koffie mit een hiempien gebak nemen, kost heur dat de man iene gulden en vuvenzestig centen of daoromtrent. Et beschrift in wezen de tied van mien jonkhied. Een kompleet aandere tied as die van now, mar veur mien generaosie nog hiel herkenber. Laeter het een Stellingwarver schriever een peer boekies schreven over Lamert en Lutske… Et is etzelde idee.